Дом-музей Апалінарыя Пупко | Івянец

Больш фотаздымкаў (13) >>

Аграсядзіба «Дом-музей А. Ф. Пупко»

У Івянцы адкрыўся для наведвальнікаў дом-музей вядомага народнага майстра, разьбяра па дрэве і мастака Апалінарыя Фларыянавіча Пупко (1893-1984), які быў зарэгістраваны дачкой і зяцем майстра як аграсядзіба. А.Пупко пражыў доўгае жыццё - больш за 90 гадоў, пакінуў пасля сябе сотні скульптур, карцін, малюнкаў, большасць з якіх раздарыў музеям Івянца, Маладзечна, Мінска... Пры яго жыцці бясплатным музеем быў і яго дом, упрыгожаны па фасадзе фігурамі драўляных атлантаў, куды ў савецкі час вазілі незлічоныя экскурсіі па дарозе ў Дзяржынава, на радзіму «жалезнага Фелікса»... Але ўжо больш за чвэрць стагоддзя сюды можна было трапіць толькі асабліва давераным адзіночкам. І вось зноў - дом таленавітага дзівака з Івянца, які перажыў некалькі цалкам розных рэжымаў, расчыніў свае дзверы для наведвальнікаў ужо ў новай якасці.

Здаецца, няма вольнага квадратнага сантыметра, да якога бы не дакрануліся пэндзаль або разец мастака - сцены, дзверы, столі пакрытыя роспісамі. Малодшая дачка, Соф'я, распавядае пра бацьку што памятае - шмат загадак стары майстар панёс з сабой. Замкнёны, як і большасць жыхароў Налібоцкага краю, якія цярпелі і пры Саветах, і пры нацыстах, ён не вельмі любіў успаміны, і што хавалася за фасадам лаяльнасці да савецкай рэчаіснасці - не пазнаць ужо ніколі. Многія карціны і малюнкі ўтрымоўваюць намёкі на згубленую рэчаіснасць, ды вось як іх расшыфраваць? Калі Вы неабыякавыя да гісторыі і культуры роднага краю - абавязкова наведайце Івянец, дзе ёсць яшчэ і выдатны музей традыцыйнай культуры, два найпрыгажэйшых касцёла - «Чырвоны» і «Белы» і рэгулярна праводзяцца цікавыя турыстычныя фестывалі.

Наведванне платнае: 8 т. руб .- з аднаго чалавека, для дзяцей - 3 т. руб. У аплату ўваходзіць правядзенне экскурсіі, агляд дома, майстэрні. Экскурсію павадзіць дачка А. Пупко - Варатніцкая Соф'я Апалінараўна.

Аграсядзіба «Дом-музей А. Ф. Пупко»
Валожынскі р-н, г.п. Івянец, вул. Камсамольская, 87
Соф'я Варатніцкая (Пупко) і Генадзь Варатніцкі
тэл. (01772) 49116, (029) 2301749, (029) 2300096