Царква Святога Аляксандра Неўскага | Крэва

Больш фотаздымкаў (22) >>

Пабудавана ў 1854 г. з бутавага каменю і цэглы ў цэнтры вёскі на пагорку. Адноўлена ў 1928 г. Прастольнае свята 6 снежня.

Помнік архітэктуры позняга класіцызму і псеўда-рускага стылю. Вырашана кампактным прамавугольным у плане аб'ёмам пад 2-схільным дахам, які над алтарнай часткай увянчаны цыбулепадобным купалам на 8-гранным барабане. Да галоўнага фасада прыбудавана 2-ярусная (васьмярык на чацверыку) шатровая званіца з макаўкай. Архітэктурная выразнасць будынка дасягаецца кантрастным спалучэннем бутавай муроўкі (элемент вонкавай архаізацыі) і атынкаваных пабеленых элементаў дэкору: руставаных вуглавых лапатак, ліштваў арачных аконных праёмаў, карніза і фрыза.

Малітоўная зала перакрыта драўляным цыліндрычным скляпеннем, апсіда вылучана драўляным іканастасам.

Літ.:
А.М. Кулагін
Праваслаўныя храмы на Беларусі
Мінск, Беларуская Энцыклапедыя, 2001