Царква Святога Іаана | Вялікая Каўпеніца

Свята-Іаанаўская царква мелася ў в. Каўпеніца, размяшчалася адасоблена ад яе, каля могілак і старой шашы Мінск—Баранавічы. Была пабудавана ў 1781 г. (спалена ў 1970-я гады). З'яўлялася помнікам народнага драўлянага дойлідства. Мела крыжовую форму плана — да асноўнага зруба далучаліся 3 прытворы і апсіда з бакавымі рызніцамі. На галоўным фасадзе ўзвышалася чацверыковая званіца з макаўкай. Двухсхільны дах пераходзіў над апсідай у гранёны вальмавы і быў завершаны па цэнтры і над апсідай макаўкамі. Фасады крапаваліся вертыкальнымі брусамі-сцяжкамі, прамавугольнымі вокнамі, поясам цокаля, прафіляваным карнізам. У малітоўную залу шырокімі прасветамі расчыняліся бакавыя прыдзелы і апсіда.

Крыніца:
Памяць. Баранавіцкі раён
Мінск. Белта. 1999