Рудавец
Вёска Рудавец знаходзіцца ў Воўчынскім сельсавеце, за 62 км на паўднёвы захад ад Камянца, 37 км ад Брэста. У 18 ст. вёска ў Берасцейскім павеце Берасцейскага ваяводства ВКЛ, у складзе маёнтка Лазовіцы. У 2-й палове 19 ст. вёска Брэсцкага павета Гродзенскай губерні Расійскай Імперыі. Паводле 10-й рэвізіі (1857) належыла памешчыку Брындзы, уладальніку Лазовіцы, 63 рэвізскія душы. З 1860-х г. у Воўчынскай воласці Брэсцкага павета. Паводле перапісу 1897 г. ў Рудавецкай сельскай грамадзе, 17 двароў, 121 жыхар. На 1905 г. - 106 жыхароў. Побач маёнтак Лазовіцы, якім валодалі Чычэрыны.
У 1921-39 гг. вёска ў Воўчынскай гміне Брэсцкага павета Палескага ваяводства Польшчы. У 1923 г. - 7 двароў, 51 жыхар. У 1940 г. ў вёсцы 45 двароў, 231 жыхар, кааператыўная крама. З 12.10.1940 г. ў Стаўскім сельсавеце Высокаўскага раёна Брэсцкай вобласці БССР. У Другую сусветную вайну на франтах загінулі і прапалі без вестак 11 жыхароў вёскі. З 16.7.1954 г. ў Воўчынскім сельсавеце. З 17.4.1962 г. ў Камянецкім раёне. У 1960 г. ў вёсцы 136, у 1970 г. — 109, у 2005 г. - 88 жыхароў. У 2 км на поўдзень ад вёскі побач з Бугам захаваліся фрагменты былога прысядзібнага парку Лазовіцы. Вёска знаходзіцца ў памежнай зоне, для наведвання патрэбны дазвол ад памежнага камітэту Беларусі.
Літ.:
Гарады і вёскі Беларусі, Энцыклапедыя, Том 4
БРЭСЦКАЯ ВОБЛАСЦЬ, кніга ІI
Мінск, «БЕЛАРУСКАЯ ЭНЦЫКЛАПЕДЫЯ», 2007