Вёска Агароднікі
Вёска Агароднікі Дзмітравіцкага сельсавета Камянецкага раёна знаходзіцца за 15 км на паўночны захад ад Камянца. У 1-й палове 19 ст. сяло ў Брэсцкім павеце Гродзенскай губерні Расійскай імперыі. Побач з вёскай размяшчаўся маёнтак Любашкі, у якім знаходзілася прыхадская царква Святога Міхала Арханёла. Паводле 10-й рэвізіі (1857) у вёсцы 110 рэвізскіх душ, дзяржаўная ўласнасць. З 1860-х гадоў у Войскай воласці Брэсцкага павета. У 1885 г. - 9 двароў, 99 жыхароў. У 1891 годзе на могілках пабудавана цакрва Узнясення Гасподняга. Паводле перапісу 1897 года ў сяле 17 двароў, 120 жыхароў, народнае вучылішча, хлебазапасны магазін, ветраны млын, кузня і 2 праваслаўныя царквы - прыхадская Міхайлаўская (прыход лічыўся Любашкаўскім) і прыпісная Ўзнясенская на могілках. У 1905 годзе 177 жыхароў.
Царква Ўзнясення Гасподняга ў АгароднікахФота © Андрэй Дыбоўскі, http://globus.tut.by | Дата: 04/2007
У 1921-39 гг. Агароднікі спачатку ў Войскай, з 3.3.1928 г. ў Дзмітравіцкай гмінах Брэсцкага павета Палескага ваяводства Польшчы. У 1923 г. ў вёсцы 18 двароў, 82 жыхары (праваслаўных - 81, каталікоў - 1). З 12.10.1940 г. - цэнтр сельсавета Камянецкага раёна Брэсцкай вобласці БССР, на той час 24 двары, 124 жыхары. З 14.4.1964 г. вёска ў Дзмітравіцкім сельсавеце. У вёсцы ў 1960 г. - 122, у 1970 г. - 64, у 2005 г. - 8 жыхароў. за 0,5 км на поўнач ад вёскі на могілках захавалася Ўзнясенская царква - помнік народнага дойлідства.
Літ.:
1. Гарады і вёскі Беларусі, Энцыклапедыя, Том 4
БРЭСЦКАЯ ВОБЛАСЦЬ, кніга ІI
Мінск, «БЕЛАРУСКАЯ ЭНЦЫКЛАПЕДЫЯ», 2007
2. Гродненский православный календарь
Православие в Брестско-Гродненской земле в конце ХІХ века, Том 1
Воронеж, 1899