Капліца Езуса Міласэрнага ў Гняздзілаве
У колішнім сядзібным парку ў Гняздзілаве захавалася адметнай архітэктуры драўляная капліца, узведзеная ў неарэнесансных формах. Капліца існавала ўжо ў 1782 г., аб чым маецца запіс ў візітацыйных дакументах полацкага дэканату - "w ogrodzie, ozdobnie zbudowana, w środku porzadek do odprawiania mszy św. majaca". У сярэдзіне 19 ст. стан капліцы апісваўся як зруйнаваны. Пазней намаганнямі Козел-Паклеўскіх была адноўлена. Была прыпісана да парафіі ў Параф'янаве.
Капліца ў Гняздзілаве на даваенным здымкуФота © Narodowe Archiwum Cyfrowe | Дата: ca. 1930
Капліца 8-гранная ў плане, складзена з бруса, мае гарызантальную абшыўку ўнутры і звонку. Завяршаецца прыгожым купалам з ліхтарыкам, які нагадвае ў мініяцюры купал касцёла ў Мядзелі. Крыпта капліцы складзена з валуноў і бута. Бутавая падпорная сценка складанай канфігурацыі (адпаведна граням капліцы).
Выгляд ад фронтуФота © Dehty | Дата: 10/2014
У сярэдзіне 2000-х гг. капліца была адноўлена і 26 жніўня 2009 г. асвечана біскупам Віцебскім Уладзіславам Блінам пад тытулам Езуса Міласэрнага. Каля капліцы захаваліся адзінкавыя надмагільныя пліты пахаванняў прадстаўнікоў роду Козелаў-Паклеўскіх і Шышкаў.
Капліца Божай Міласэрнасці ў Гняздзілаве. Фота © Кастусь Шыталь | Дата: 01/05/2012