Касцёл Святога Яна Хрысцiцеля | Опса

Больш фотаздымкаў (20) >>

Першы драўляны касцёл фундаваны тагачаснымі уладальнікамі мястэчка Опса Цеханавецкімі каля 1676 г. Мураваны касцёл Св. Яна, які дайшоў да нашага часу, пабудаваны ў пачатку 20 ст. з цэглы ў цэнтры былога мястэчка. У савецкі час храм выкарыстоўваўся пад гаспадарчыя патрэбы. Перададзены вернікам у канцы 1980-х.

Касцёл — помнік архітэктуры неаготыкі. Аднанефавы аднавежавы храм з пяціграннай алтарнай апсідай, па баках якой нізкія сіметрычныя сакрысціі. Асноўны аб'ём накрыты двухсхільным дахам, больш нізкая апсіда — вальмавым, сакрысціі — двухсхільнымі дахамі, якія вырашаны на тарцах накшталт вымпергаў. Такі самы вымперг аздабляе партал галоўнага ўвахода. Над ім размешчана акно-ружа, вышэй падвойнае арачнае акно. Вежа-званіца завершана востраканцовым шатром. У дэкоры выкарыстаны цагляныя прафіляваныя цягі, аркатурныя паясы, лапаткі і арачныя нішы. Унутры неф і апсіда перакрыты цыліндрычным скляпеннем з распалубкамі.

Крыніца:
Т.В. Габрусь
Збор помнікаў гісторыі і культуры Беларусі. Віцебская вобласць
Мінск, Беларуская Энцыклапедыя, 1985