Манастыр базыльянаў | Орша

Больш фотаздымкаў (18) >>

У Музейным завулку, на правым беразе р. Аршыца. Пабудаваны ў 1758 г. як базыльянскі кляштар паводле жадання і на ахвяраванні старосты аршанскага Івана Ляпкоўскага (пасля гэтага ён сам уступіў у ордэн, прыняўшы ў манастве імя Іосіф; дасягнуўшы пасады архіепіскапа смаленскага, памёр у Воршы ў 1771 і пахаваны ў загалоўным храме прыстанку) і са згоды яго брата ротмістра Міхаіла. У 1832 г. комплекс перададзены да праваслаўных - мужчынскаму Пакроўскаму манастыру. Ансамбль складаўся з царквы Апекі Маці Божай (1758—74; не захавалася) і прыбудаванага да яе жылога корпуса.

Уцалелы манастырскі будынак — помнік архітэктуры барока. Вырашаны Г-падобным у плане 2-павярховым на высокім паўпадвальным паверсе будынкам пад вальмавым дахам. Сцены мятровай таўшчыні крапаваны слаістымі пілястрамі і руставанымі лапаткамі, расчлянёны пазбаўленымі ліштваў прамавугольнымі аконнымі праёмамі і нішамі-блендамі паміж імі. Абодвы паверхі маюць галерэйную планіроўку. У паўднёва-ўсходняй частцы размешчана лесвічная клетка і зала-трапезная. Перакрыцце 1-га паверха — крыжовыя скляпенні, 2-га — плоская бэлечная столь, паўпадвальнага паверха — цыліндрычныя скляпенні з распалубкамі.

Літ.:
А.М. Кулагін
Праваслаўныя храмы на Беларусі
Мінск, Беларуская Энцыклапедыя, 2001