Касцёл у Асавой
У 1648 г. намаганнямі сям’і Карповічаў і іншай навакольнай шляхты ў Асавой быў пабудаваны драўляны касцёл з лістоўніцы. Касцёл быў філіяльным, над якім апекаваліся манахі-францысканцы з Пінска. Пасля падаўлення паўстання 1863 г. касцёл у Асавой хацелі перадаць у праваслаўнае ведамства, але мясцовы люд адстаяў касцёл.
Касцёл (1648 г.) у Асавой на міжваенным здымкуФота © Zbigniew Junkiewicz | Дата: < 1939
У 1930–я гг. парафія ў Асавой налічвала 500 вернікаў. Пасля прыходу савецкай улады ў 1944 г. касцёл быў зачынены. У кастрычніку 1968 г. паводле загаду праўлення мясцовага калгаса будынак касцёла быў разабраны на гаспадарчыя патрэбы. Усё начынне касцёла было спалена, а часткова разабрана мясцовымі жыхарамі па хатах. З разабранага касцёла ў суседніх Асаўцах быў пабудаваны будынак праўлення калгаса.
Да нашага часу захавалася драўляная званіца, якая стаяла побач са старым касцёлам. У 1990-ыя гг. званіцу пераробілі ў капліцу. У 1993 г. пад кіраўніцтвам кс. Тадэвуша Шэшко пачалося будаўніцтва новага касцёла. У ліпені 1999 г. кардынал Казімір Свёнтэк кансэкраваў новы касцёл Ўнебаўзяцця Найсвяцейшай Панны Марыі ў Асавой.