Вёска Покры
Вёска Покры знаходзіцца за 24 км на паўночны захад ад Брэста, у Чарнаўчыцкім сельсавеце Брэсцкага раёна. У 1739 г. каля вёскі пабудавана драўляная ўніяцкая царква. Пасля 3-га падзелу Рэчы Паспалітай (1795 г.) у Слонімскай, з 1797 г. — у Літоўскай, з 1801 г. — у Гродзенскай губерні Расійскай імперыі. У 1840 г. пасля скасавання Ўніі і пераводу ў праваслаўе жыхарамі вёскі і панам Адамам Баяроўскім царква абноўлена.
Царква Покрыва Прасвятой Багародзіцы ў ПокрахФота © К. Шастоўскі | Дата: 07/03/2004
Паводле матэрыялаў 1858 г. Покры - сяло у Брэсцкім павеце (145 сялянскіх душ). Уваходзіла ў маёнтак Дзямянчыцы пані Баяроўскай. У 1870 г. дзейнічала народнае вучылішча. У 1886 г. 17 двароў, 180 жыхароў, царкоўна-прыходская школа, у Турнянскай воласці Брэсцкага павета. У 1890 г. сяло — цэнтр сялянскага таварыства. Паводле перапісу 1897 г. 38 двароў, 273 жыхары, хлебазапасны магазін, у Турнянскай воласці Брэсцкага павета. У 1905 г. 297 жыхароў.
Вуліца ў ПокрахФота © К. Шастоўскі | Дата: 07/03/2004
Паводле Рыжскай мірнай дамовы 1921 г. ў складзе Польшчы, у Турнянскай гміне Брэсцкага павета Палескага ваяводства. На 30.9.1921 г. 7 двароў, 30 жыхароў (усе праваслаўныя). З 1939 г. ў складзе БССР. У 1940 г. 60 двароў, 290 жыхароў. У Другую сусветную вайну гітлераўцы спалілі 35 двароў, 11 вяскоўцаў загінулі на фронце. Паводле перапісаў 1959 г. — 249 жыхароў, 1970 г. — 216 жыхароў, 1997 г. - 253 жыхары, 2005 г. - 78 гаспадарак, 209 жыхароў. На поўнач ад вёскі знаходзіцца Пакроўская царква — помнік народнага драўлянага дойлідства стылю барока.
Крыніца:
Гарады і вёскі Беларусі, Энцыклапедыя, Том З
БРЭСЦКАЯ ВОБЛАСЦЬ, кніга І
Мінск, «БЕЛАРУСКАЯ ЭНЦЫКЛАПЕДЫЯ», 2006