Прысядзібны парк (рэшткі) | Бабоўня

Больш фотаздымкаў (7) >>

Сядзіба ў в. Бабоўня была сфармавана ў 18 ст. у барочным стылі, у 1880 г. пашырана і перапланавана ў эклектычных формах. Упершыню маёнтак з’явіўся тут у другой палове XVI ст. У XVII ст. ім валодалі Радзівілы, з XVIII ст. – Бярновічы. У 1823 годзе маёнтак набылі Наркевічы–Ёдкі. Адным з уладароў сядзібы быў Вітальд – вядомы хірург-акуліст. Па спадчыне маёнтак у Бабоўні перайшоў сыну Вітальда – Вітальду-малодшаму (1864-1924 гг.). На жаль, сядзібны комплекс страчаны. Часткова захаваліся стары парк, водная сістэма, вінакурня (стаіць адасоблена сярод вясковай забудовы).

Парк, плошчай каля 9 га, быў закладзены ў другой палове 18 ст. як рэгулярны. У 1880 г. быў перапланаваны. У аснову новай планіроўкі лёг вялікі баскет старога парку. Перад домам быў размешчаны партэр, які з паўднёвага боку падкрэсліваўся вадаёмам. З бакоў партэр акружалі пейзажныя групы, у склад якіх былі ўведзены рэдкія экзоты (конскі каштан жоўты, дуб чарэшчаты кіпарысавідны, явар пурпуралісцевы, лістоўніца еўрапейская і інш.). З двух бакоў партэра – баскеты з пладовым садам. З заходняга і ўсходняга бакоў парку размешчаны прамавугольныя ўчасткі, тэрыторыя якіх спланавана ў пейзажным стылі.

Найбольш складаная кампазіцыя з заходняга боку, дзе маецца водная сістэма з трох вадаёмаў, з дамбамі, масткамі. Іх упрыгожвалі рэдкія расліны. Ад партэра да вадаёмаў вяла яварная алея. Паўднёва-заходні вадаём меў востраў з альтанкаю, які служыў месцам для адпачынку і прагулак. Узрост некаторых ліп у парку дасягае 200 гадоў, векавыя дрэвы явара мелі вышыню 16-17 м.