Сядзіба | Слонім

Больш фотаздымкаў (6) >>

Асабняк у Слоніме

Асабняк па сучаснай вуліцы Камсамольскай, дом № 25 (вуліца вядома з XVII ст. пад назвай Замкавая) у Слоніме. Будынак пабудаваны ў першай палове XIX ст. з цэглы (вядомы пад назвай «Ніжні замак»).

Невялікі прамавугольны ўчастак гарадскога асабняка спланаваны па сядзібнай схеме: аднапавярховы дом з цэнтральным чатырохкалонным порцікам вынесены ў глыбіню ўчастка. Парадны курданер фланкіраваны двума прамавугольнымі ў плане флігелямі (дамы № 27 і 29), якія вырашаны нейтральна, без ярка выяўленай архітэктурнай дэталізацыі.

Будынак асабняка устаноўлены на высокі цокальны паверх (выкарыстоўваўся пад службы) з крыжовымі скляпеннямі перакрыццяў, накрыты вальмавым дахам. Цэнтральны ўваход выдзелены мансардавым порцікам, які мае ампірную трактоўку: здвоеныя канелюраваныя калоны. Дэкор экстэр'ера абмежаваны вуглавымі руставанымі лапаткамі і прафіляванымі карнізамі з сухарыкамі. Фасады расчлянёны рэгулярным рытмам прамавугольных аконных праёмаў. Уцалелыя часткі капітальных сцен сведчаць аб былой калідорнай планіроўцы дома.

Асабняк з'яўляецна помнікам жылой грамадзянскай архітэктуры і ілюструе панаваўшы ў дойлідстве Беларусі першай паловы XIX ст. мастацкі метад позняга класіцызму.