Баршчэва - фота і помнікі

Баршчэва

Вёска Баршчэва знаходзіцца ў Ратайчыцкім сельсавеце Камянецкага раёна, за 25 км на паўднёвы захад ад Камянца, за 35 км ад Брэста. Паселішча ўпамінаецца ў 2-й палове 15 ст. ў дакументах запісаў зямельных дач каралём Казімірам, у Берасцейскім павеце Берасцейскага ваяводства ВКЛ. У сярэдзіне 19 ст. вёска і аднайменны маёнтак у Брэсцкім павеце Гродзенскай губерні. Паводле інвентара за 1845 г. маёнтак належаў памешчыкам графам Грабоўскім. У склад маёнтка ўваходзілі 4 фальваркі, 5 вёсак, каля 2884 дзесяцін зямлі, 4 карчмы, 2 ветраныя млыны, млын на валавой цязе, 2 вінакурні. Паводле 8-й рэвізіі (1833) тут было 15 дваровых людзей, 836 рэвізскіх душ. У вёсцы на гэты час 35 двароў, 276 рэвізскіх душ. У 1840 г. на сродкі ўладальніцы маёнтка Пелагеі Грабоўскай пабудавана Ануфрыеўская царква.

Ануфрыеўская царква ў БаршчэвеФота © К. Шастоўскі | Дата: 09/07/2005

Паводле 10-й рэвізіі (1857) вёска Баршчэва ў складзе маёнтка Бабічы, які належаў Карловічу, налічвалася 278 рэвізскіх душ. У 1874 г. на вясковых могілках прыхаджанамі пабудавана могілкавая царква Святой Параскевы Пятніцы. У 1885 г. Баршчэва - сяло ў Ратайчыцкай воласці Брэсцкага павета Гродзенскай губерні, 33 двары, 353 жыхары, царква, ветраны млын, карчма. У 1897 г. ў сяле 65 двароў, 441 жыхар; царква, царкоўна-прыходская школа, хлебазапасны магазін, карчма, кузня. У 1905 г. ў сяле 521 жыхар, у маёнтку — 19 жыхароў.

Поле ў ваколіцах вёскіФота © К. Шастоўскі | Дата: 09/07/2005

У 1921—39 гг. Баршчэва ў Ратайчыцкай гміне Брэсцкага павета Палескага ваяводства Польшчы, у 1923 г. 18 двароў, 152 жыхары. У 1940 г. ў вёсцы 540 жыхароў. З 12.10.1940 г. — цэнтр Баршчэўскага сельсавета Высокаўскага раёна Брэсцкай вобласці. У Другую сусветную вайну на франтах загінулі і прапалі без вестак 18 жыхароў вёскі. У 1948 г. ў 7-гадовай школе 230 вучняў. У 1949 г. ў вёсцы арганізаваны калгас «Іскра». З 1953 г. Баршчэва ў калгасе «Ленінскі шлях». З 17.4.1962 г. вёска ў Камянецкім раёне, з 3.7.1972 г. ў Малазводскім, з 18.10.1982 г. ў Ратайчыцкім сельсавеце. Паводле перапісаў у Баршчэве ў 1959 г. - 431, 1970 г. - 319, 2005 г. - 90 жыхароў. У вёсцы захваўся помнік архітэктуры - царква Святога Ануфрыя. У 2000-я гг. на месцы Пятніцкай царквы 1874 г. пабудавана новая могілкавая капліца.

Крыніца:
Гарады і вёскі Беларусі, Энцыклапедыя, Том 4 
БРЭСЦКАЯ ВОБЛАСЦЬ, кніга ІI 
Мінск, «БЕЛАРУСКАЯ ЭНЦЫКЛАПЕДЫЯ», 2007