Сабор Святога Сімеона катэдральны | Брэст

Катэдральны Сімеонаўскі сабор у Брэсце

Свята-Сімеонаўскі сабор у Брэсце стаіць на скрыжаванні пр. Машэрава і вул. К. Маркса.  Узгадка пра катэдральную царкву і Сімеонаўскі манастыр у стражытным Берасці адносіцца да XIV ст. У ім, да пабудовы ў новым горадзе існуючай царквы, захоўваліся мошчы прападобнага ігумена Афанасія Філіповіча, закатаванага ў 1648 г. Пасля перасоўвання горада, у 1846 г. быў зацверджаны першы праект будаўніцтва новай царквы. На таргах падрада на будаўніцтва храма не знайшлося пакупнікоў, у сувязі з чым было вырашана весці работы гаспадарчым спосабам у межах вылучанай урадам сумы. Гэта прымусіла значна спрасціць праект, які і быў зацверджаны ў 1854 г.

Свята-Сімеонаўскі сабор у Брэст-Літоўску на здымку канца 19 ст.Дата: ca. 1895

Новая царква пабудавана ў 1865-68 гг. (па інш. дадзеных - 1862-1865 гг.) з цэглы на вул. Шасэйнай паводле праекта брэсцкага гарадскога архітэктара В. Палікарпава. У 1886 г. капітальна адрамантавана пад наглядам акадэміка архітэктуры В.І. Чагіна. У 1988 г. храм адноўлены.

Катэдральны сабор Святога Сімеона ў БрэсцеФота © Сяржук Гайко | Дата: 08/2012

Свята-Симеонаўскі сабор у Брэсце - помнік архітэктуры псеўда-рускага стылю. Будынак мае ў плане кампазіцыю ў выглядзе  цэнтрычнага крыжа: магутны кубападобны аб'ём узнесены на высокі філёнгавы цокаль з ружовага граніту і завершаны 5-купаллем, сярод якога дамінуе вялікі 8-гранны барабан. Уваход вырашаны кілепадобным перспектыўным парталам, над якім ніша такой жа формы з выявай Сімеона-столпніка. Фасады прарэзаны вузкімі арачнымі аконнымі праёмамі, апяразаны прафіляваным карнізам і філёнгавым парапетам з 3-вугольнымі франтонамі.

Інтэр'ер царквыФота © Сяржук Гайко | Дата: 08/2012

У інтэр'еры светлавы барабан праз ветразі і 4 аркі абапіраецца на 4 магутныя пілоны. Прыдзелы, прытвор і апсіда перакрыты цыліндрычнымі і крыжовымі скляпеннямі. У залу шырокім арачным прасветам раскрываюцца хоры. Інтэр'ер дэкарыраваны трафарэтнай арнаментыкай. Апсіда вылучана шырокім арачным прасветам і драўляным іканастасам.

Помнік Афанасію Брэсцкаму побач з саборамФота © Грода Яраслаў

18.8.1997 г. ў саборы мітрапаліт Мінскі і Слуцкі Філарэт асвяціў копію крыжа Ефрасінні Полацкай, выкананую брэсцкім мастаком М.Кузьмічом. У 2005 г. побач з царквой усталяваны помнік Афанасію Філіповічу.

Літ.:
А.М. Кулагін
Праваслаўныя храмы на Беларусі
Мінск, Беларуская Энцыклапедыя, 2001