Могілкі старыя | Рудня

Месьцяцца на паўднёва-ўсходнім ускрайку вёскі, левабоч дарогі на Кутняны. Яшчэ да Другое сусьветнае вайны на могілках стаяла царква, прыпісаная да Баноньскай царквы Сьв. Юрыя. Месца былое царквы сёньня пустуе, бо ніхто зь вяскоўцаў не адважыцца пахаваць сваяка на сьвятым месцы, а мо спадзяюцца на адбудову. Закладзенныя могілкі недзе ў ХІХ ст., бо няма на іх старых каменных крыжоў, а першае датаванае пахаваньне належыць Антону Кляменцічу Дытке (1829 – 24.07.1903). Тутэйшыя помнікі падобныя да помнікаў на полацкіх могілках, што сьведчыць пра цесную сувязь навакольных вёсак з горадам.



Хавалі тут ня толькі руднянцаў, але і жыхароў маленечкіх навакольных вёсак, такіх як Рагачы, або Машалёва. Пахаваныя тут і жыхары вёсачкі Маразы, што знаходзілася ў нейкіх двух кілямэтрах на ўсход ад Рудні і была спаленая ў вайну ў часе чарговае карнае акцыі.

Міхась Баўтовіч